ពេលដែលស្បែកក្បាលស្ងួត កោសិកាដែលងាប់វានឹងរបកចេញ។ ស្បែកក្បាលមានអង្គែ ឬរបកសៗ តែងបង្កការរំខានដោយការរមាស់ក្បាល និងធ្វើឱ្យអ្នកខ្មាស់ដោយសារកម្ទេសសៗធ្លាក់ប្រលាក់លើសម្លៀកបំពាក់របស់អ្នក ប៉ុន្តែភាគច្រើនវាមិនឆ្លង ឬមានភាពធ្ងន់ធ្ងរឡើយ តែយ៉ាងណាមិញ ផលវិបាកដ៏កម្រមួយទៀត វាអាចមានមេរោកចូលតាមស្បែករបកនោះ បង្កឱ្យមានខ្ទុះ ស្នាមប្រែទៅក្រហម និងមានការឈឺចាប់ខ្លាំង ដែលតម្រូវឱ្យអ្នកជួបគ្រូពេទ្យដើម្បីព្យាបាលជាបន្ទាន់។
ការកកើតនៃអង្គែនៅលើស្បែកក្បាល អាចបង្កមកពីមូលហេតុជាច្រើន ដូចជា៖
- អាកាសធាតុប្រែប្រួល ៖ ក្នុងអំឡុងពេលរដូវក្ដៅ ឬរដូវរងា ស្បែកក៏ប្រែទៅជាស្ងួតដែរ។ ការនៅក្នុងបន្ទប់ម៉ាស៊ីនត្រជាក់យូរ ឬនៅជិតម៉ាស៊ីនកម្ដៅយូរក៏ធ្វើឱ្យស្បែកក្បាលយើងស្ងួតដែរ។
- ការខ្ជិល ៖ មិនសូវកក់សក់ធ្វើឱ្យស្បែកក្បាលឡើងប្រេងខ្លាំង កកដុំៗ ក្លាយជាអង្គែ
- ខ្វះជាតិទឹក ៖ រាងកាយខ្វះជាតិទឹកធ្វើឱ្យស្បែកយើងស្ងួត។ ការខ្វះជាតិទឹកក៏ធ្វើឱ្យស្បែកក្បាលស្ងួតដូចគ្នា ដែលអាចនាំឱ្យកើតជាអង្គែ
- ការរលាក ៖ ដែលច្រើនកើតរួមជាមួយសញ្ញាក្រហមស្បែកក្បាល របកស ឬលឿង
- ស្ត្រេស ៖ ស្ត្រេសធ្វើឱ្យអ័រម៉ូនមិនមានតុល្យភាព ការមិនមានតុល្យភាពនៃអ័រម៉ូនក៏ជាមូលហេតុមួយនាំឱ្យស្បែកក្បាលឡើងអង្គែដែរ។
ដំណោះស្រាយ
អង្គែអាចកើតម្តងហើយម្តងទៀតបានគ្រប់ពេលបើមិនរក្សាអនាម័យឱ្យបានខ្ជាប់ខ្ជួនទេនោះ។ ដូច្នេះ អ្នកត្រូវរក្សាស្បែកក្បាល ដោយកក់សក់ជាទៀងទាត់យ៉ាងហោចណាស់៣ ដងក្នុងមួយសប្តាហ៍ និងធ្វើការម៉ាស្សាថ្នមៗ។ សម្រាប់បញ្ហាអង្គែកម្រិតស្រាល ជាដំបូងយើងអាចសាកល្បងប្រើសាប៊ូកក់សក់លាងសម្អាតប្រេង និងកោសិកាស្បែកងាប់ជាប់នៅលើស្បែកក្បាល។ ចៀសវាងការប្រើសារធាតុគីមីលើស្បែកក្បាល ដូចជាលាបពណ៌សក់ ជែលលាបសក់ ស្ព្រាយបាញ់សក់ និងកាត់បន្ថយស្ត្រេសជាដើម ។
អត្ថបទដោយ៖ KiloHEALTH
